Շարունակական խնամքի բարելավման միջոցառումներ

15.04.2019

ԱՄՆ Միջազգային զարգացման գործակալության ֆինանսավորվմամբ, Նեոնատալ բժշկության հայկական ասոցիացիայի կողմից իրականացվող «Հայաստանում նեոնատալ ծառայությունների որակի բարելավման ծրագրի» շրջանակներում ստեղծված Վերարտադրողական, մայրական, նորածնային եւ մանկական խնամքի շարունակակության կոնսորցիումի անդամներն շարունակում են իրենց աշխատանքները փոքր դրամաշնորհների ծրագրով:

 

Ընտանեկան բժիշկների միավորման կողմից իրականացվող երկու ծրագրերն էլ ուղղված են ապագա մայրերին: Դրանցից մեկը «Մայրիկների ակումբ» կրթական ծրագրն» է, որի ընթացքում ապագա մայրերն օգտակար տեղեկություններ են ստանում հղիության, երեխաների ծննդի եւ նորածնի խնամքի մասին, իսկ մյուսը Կանխարգելիչ խնամքի բարելավում առաջնային բուժծառայությունների օղակում» վերապատրաստումների շարքն է բուժանձնակազմի համար, որի ընթացքում մասնագետները կանանց հղիությանը նախապատրաստելու կարեւոր քայլերին են ծանոթանում:

 

 

 

Երիտասարդ բժիշկների հայկական ասոցիացիայի ծրագրերից մեկը Հայկական ակնաբուժության նախագծի «Սիմուլացիոն կենտրոն»-ում նորածինների վերակենդանացման թիմային աշխատանքի հմտությունների կատարելագործման փորձնական ծրագիրն է, որի շրջանակներում հանրապետության տարբեր մարզերից հրավիրված նեոնատոլոգները, մանկաբարձ-գինեկոլոգները, նեոնատալ բուժքույրերը եւ մանկաբարձուհիները հնարավորություն են ունենում խորացնելու իրենց տեսական գիտելիքները եւ կիրառական հմտությունները նորածնի առաջնային թիմային վերակենդանացման բնագավառում, իսկ սիմուլյացիոն տեխնոլոգիաները հնարավորություն են տալիս կիրառել եւ ամրապնդել ձեռք բերած գիտելիքը: Հաջորդ ծրագիրը, որն իրականացնում է նույն ասոցիացիան, նվիրված է պտղի զարգացման բարդությունների ախտորոշման եւ կառավարման բարելավմանը:

 

 

 

Մանկաբույժների հայկական ասոցիացիան իրականացնում է «Երեւանի մանկաբարձության/գինեկոլոգիայի, նորածնային եւ մանկաբուժական ծառայություններում ինտեգրված պերինատալ պալիատիվ խնամքի հիմունքների ներդրում» ծրագիրը, որի նպատակն է բուժաշխատողների շրջանում զարգացնել պերինատալ պալիատիվ օգնության վերաբերյալ գիտելիքները, հմտությունները եւ համապատասխան մոտեցումները, բարելավել պտղի եւ նորածնի կյանքին սպառնացող կամ կյանքի տեւողությունը սահմանափակող վիճակի ախտորոշման պարագայում հղիներին, ծննդկաններին, նորածիններին եւ ընտանքիներին տրամադրվող առողջապահական եւ հոգեբանական ծառայությունների որակը:

 

Վերոնշյալ բոլոր միջոցառումների նպատակն է աջակցել պիլոտային ծրագրերի՝ փորձարկելու «Շարունակական խնամք» բաղադրիչի մոտեցումները և դրանց իրատեսությունը:

Շարունակական խնամքի բարելավման միջոցառումներ